Rozhajë, 13 korrik 2025 – Në sallën e Shtëpisë së Kulturës në Rozhajë, u mbajt sot promovimi i vëllimit të shtatë të veprës madhore “Libri i Bardhë i Viktimave të Sanxhakut”, i autorit Fehim Džogović. Ky botim i fundit është i përkushtuar viktimave të komunës së Rozhajës gjatë periudhës së Luftës së Dytë Botërore (1941–1945), dhe përmban dokumentacion të çmuar për fatin tragjik të civilëve.
Ngjarja u organizua nga Instituti për Histori, Demografi dhe Antropologji i Sanxhakut (IHDAS), që vepron në kuadër të Akademisë Boshnjake, me seli në Rozhajë dhe Novi Pazar.
Në këtë ngjarje të rëndësishme kulturore e shkencore morën pjesë emra të njohur të botës akademike, si akademik Ferid Muhić, akademik Šerbo Rastoder (drejtor i Institutit), dr. Sait Šabotić, si dhe autori i veprës Fehim Džogović. Moderatore e takimit ishte znj. Gordana Ganić.
Me këtë rast, u ndanë edhe mirënjohje dhe “Plaketa të Arta” për personalitetet që kanë dhënë kontribut të veçantë në zhvillimin dhe avancimin e punës së Institutit.
Njëra ndër Plaketat e Arta iu nda z. Ismet Azizit, kryetar i shoqatës “Kosova për Sanxhakun”, njëherësh studiues i njohur i historisë së Sanxhakut dhe ndër të vetmit studiues shqiptar që ka kontribuar në mënyrë të vazhdueshme në dokumentimin e gjenocidit në krahinën e Sanxhakut dhe viseve të tjera shqiptare për rreth kësaj krahine.
Kontributi i tij u veçua sidomos për punimin e paraqitur në Konferencën Shkencore të mbajtur nga ky Institut vitin e kaluar, ku trajtoi Gjenocidin serbo-malazez në Bihor dhe ndikimin e tij në themelimin e Lidhjes së Dytë të Prizrenit. Ky studim la gjurmë të thella në opinionin akademik dhe hapi rrugë për një bashkëpunim të ri ndërinstitucional dhe ndërkulturor.
Z. Azizi, në fjalën e tij të shkurtër falënderuese, vlerësoi këtë nderim si një hap të rëndësishëm drejt ndërtimit të urave të besimit dhe bashkëpunimit në Sanxhak dhe më gjerë, me theks të veçantë në promovimin e kujtesës historike dhe të vërtetës.
“Kjo plaketë është një simbol i besimit dhe i hapjes për një të ardhme më të ndritshme ndërmjet popujve tanë, mbi bazën e respektit dhe njohjes së së vërtetës historike,” u shpreh Azizi.
dardaniapress.net