Prej 169 komunave në Serbi, vetëm gjashtë prej tyre në vitin 2017 kanë pasur një rritje pozitive natyrore – Novi Pazari, Bujanoci, Sjenica, Novi Sad, Presheva dhe Tutini.
Kështu shkruajnë mediat serbe, të cilat tregojnë se sipas statistikave të fundit, me përjashtim të qytetit më të madh në Vojvodinë, kjo rritje ka të bëjë me komunat të cilat një pjesë të konsiderueshme janë të banuara me boshnjakë dhe shqiptarë.
Madje, frika e serbëve nuk është vetëm kjo. Sipas tyre, përcjell Telegrafi, listat demografike gjithashtu paralajmërojnë se Serbia ka rritjen më të ulët natyrore në raport me të gjitha republikat ish-Jugosllave.
Nga ana tjetër, vetëm 32 nga 233 vendet në planet shënojnë një rënie në numrin e banorëve, ndërsa vetëm 18 vende të botës kanë një rritje negative natyrore, nga të cilat 17 janë në Evropë.
Nga këto 18 vende që kanë shënuar një rënie të popullsisë, 13 prej tyre janë përballur me rritje negative natyrore dhe migracion, dhe në mesin e tyre është edhe Serbia, citohet të ketë paralajmëruar Ivan Marinkoviç, bashkëpunëtor shkencor i Institutit të Shkencave Shoqërore në Serbi.
Në Serbi, paralajmëron ai, çdo vit, 35.000 deri në 38.000 njerëz vdesin më shumë se sa kanë lindur.
“Kështu që nuk duhet të habitemi që mes dy regjistrimeve të popullsisë ‘kemi humbur’ mes 350.000 dhe 380.000 banorë”, ka thënë Marinkoviç.
Për më tepër, shkruajnë mediat serbe, përcjell Telegrafi, për shkak të emigrimit të popullsisë së re, Serbia ka një strukturë moshe shumë të pafavorshme – mosha mesatare e popullsisë është thuajse pothuajse 43 vjet.
“Dhe nëse tendencat aktuale demografike vazhdojnë, në vitin 2061, Serbia parashihet të ketë tre milionë njerëz më pak se sot”, paralajmëron Marinkoviç. /Telegrafi/