5 milion turq me prejardhje shqiptare mund të mësojnë shqip në 8 vjeçare

Shykyr

Minoriteti shqiptar në Turqi sipas shumë studiuesve shkon deri në 5 milion persona. Të shumtë janë personalitetet turke që ka deklaruar se janë shqiptar, duke filluar nga futbollisti Hakan Shukur apo ish-shefi Shtabit të Ushtrisë turke.

Mirëpo mësimdhënia e gjuhës shqipe si lëndë me zgjedhje në shkollat 8-vjeçare në Turqi, përkrah kurseve intensive të pavarura të shqipes, u konsiderua të martën si një arritje e rëndësishme nga ambasadori i Shqipërisë në Ankara, Genti Gazheli.

Në mesazhin drejtuar shqiptarëve me rastin e festave të fundvitit, Gazheli evidentoi të gjitha sfidat dhe arritjet gjatë vitit 2018.

“Viti 2018 po mbledh rrezet e fundit dhe kjo ambasadë mendon se i ka përmbushur më së miri sfidat që u shfaqën. Sfidat tona në të shumtën e rasteve ishin dhe janë kurorëzim suksesesh. Viti që po lëmë, për nga ana e realizimit të objektivave, mund të thuhet se ka shumë pika për t’u vënë në pah”, tha Gazheli.

Numri i individëve apo i bizneseve, që duan të vijnë në Turqi apo të shkojnë në Shqipëri, sipas ambasadorit, është gjithnjë në rritje.

“Natyrisht, marrëdhëniet strategjike me Turqinë janë të përsosura dhe ne vazhdojmë të punojmë për cilësi të lartë në këtë aspekt. Gjithsesi, krahas këtyre marrëdhënieve të mira politike, fusha ekonomike mbetet përparësi, ku duhet punuar më tepër për këtë qëllim. Në këtë pikë ndërhyrja e Turqisë është thelbësore”, tha Gazheli.

Shykyr

Për sa i përket gjeopolitikës, Gazheli vlerësoi se Turqia është një ndër partnerët besnikë të Shqipërisë dhe të çështjes shqiptare kudo në botë, të cilën e ka vërtetuar me mbështetjen e fundit të kandidaturave tona në OSBE, në Këshillin e Bashkëpunimit Rajonal, etj.

Veç kësaj, Gazheli theksoi se Ambasada shqiptare ka qenë aktive si në diplomacinë ekonomike me vizitat që ka bërë ashtu edhe në thithjen e investimeve. Po ashtu ai nënvizoi asistencën e ofruar shqiptarëve apo rolin e Ambasadës në ekuilibrin e marrëdhënieve me vendin pritës dhe vendin që mbulon.

Ambasadori Gazheli theksoi edhe se shumë të sëmurë që zgjedhin të kurohen në Turqi, falë marrëveshjes midis dy shteteve, gjejnë mbështetje dhe zgjidhje këtu.

/faktor.al/