Në Mitrovicë ‘RTV Mitrovica’ dhe ‘TV Mir’ nga Leposaviqi, kanw organizuar Konferencën “Bashkëpunimi mes komunave” në të cilën kanë marrë pjesë ambasadorë të ndryshëm dhe kryetarë shqiptarë e serbë të komunave të Kosovës.
Raportet aktuale mes komunave në Kosovë, çfarë do të përfitonin qytetarët nga një komunikim më i mirë mes këtyre komunave, cilat probleme mund të zgjidhen përmes këtij komunikimi, si dhe të ngjashme, ishin temat që u diskutuan gjatë konferencës “Bashkëpunimi mes komunave” që u mbajt të enjten në Mitrovicë.
Në këtë konferencë të organizuar nga ‘RTV Mitrovica’ dhe ‘TV Mir’ nga Leposaviqi, kanë marrë pjesë ambasadorë të ndryshëm dhe kryetarë shqiptarë e serbë të komunave të Kosovës.
Agim Bahtiri, kryetar i Mitrovicës, ka bërë të ditur se prej ardhjes së tij në pushtet në Mitrovicë është krijuar një ambient tjetër, fal bashkëpunimit të ngushtë me homologun e tij nga veriu, por edhe me qytetarët.
Sipas tij, nuk duhet dëgjuar qëndrimet e Prishtinës dhe as të Beogradit, sepse kryetarët, por edhe qytetarët e Mitrovicës, i njohin problemet më mirë sesa Prishtina zyrtare dhe Beogradi.
Nenad Radosavleviq, këshilltar i komunës së Leposaviqit, potencoi se serbët e veriut akoma nuk ndjehen të sigurtë, përkundër investimit ndërkombëtar në Kosovë. Ai tha se mbijetesa dhe perspektiva për bashkimin me Serbinë janë pothuajse problemet kryesore të regjistruara në kokat e serbëve të asaj pjese, ndërsa kritikoi OSBE-në dhe UNMIK-un se nuk kanë punuar asgjë deri tani në Kosovë.
Në anën tjetër, Naim Ismajli, kryetar i komunës së Shtimes, njëherësh kryetar i Asociacionit të Komunave të Kosovës, ka përgëzuar organizatorët e kësaj konference, duke e quajtur takimin e sotëm me peshë të veçantë. Ai ka thënë se mos pranimi i shtetit të Kosovës nga Serbia, pastaj deklaratat e vazhdueshme se nuk do ta njohin Kosovën edhe në të ardhmen, janë elemente kyçe të cilat injektojnë popullatën serbe këtu për mos bashkëpunim të mirëfilltë ndërinstitucional.